re de Saine,
Mes qu'ele iere plus espandue.
Onques mes n'avoie veue
Tele iaue qui si bien coroit:
Moult m'abelissoit et seoit
A regarder le leu plaisant.
De l'iaue clere et reluisant
Mon vis rafreschi et lave.
Si vi tot covert et pave
Le fons de l'iaue de gravele;
La praerie grant et bele
Tres au pie de l'iaue batoit.
Clere et serie et bele estoit
La matinee et atempree:
Lors m'en alai parmi la pree
Contreval l'iaue esbanoiant,
Tot le rivage costoiant.

* * * * * *

Une ymage ot empres escrite,
Qui sembloit bien estre ypocrite,
_Papelardie_ ert apelee.
C'est cele qui en recelee,
Quant nus ne s'en puet prendre garde,
De nul mal faire ne se tarde.
El fait dehors le marmiteus,
Si a le vis simple et piteus,
Et semble sainte creature;
Mais sous ciel n'a male aventure
Qu'ele ne pense en son corage.
Moult la ressembloit bien l'ymage
Qui faite fu a sa semblance,
Qu'el fu de simple contenance;
Et si fu chaucie et vestue
Tout ainsinc cum fame rendue.
En sa main un sautier tenoit,
Et sachies que moult se penoit
De faire a Dieu prieres faintes,
Et d'appeler et sains et saintes.
El ne fu gaie ne jolive,
Ains fu par semblant ententive
Du tout a bonnes ovres faire;
Et si avoit vestu la haire.
Et sachies que n'iere pas grasse.
De jeuner sembloit estre lasse,
S'avoit la color pale et morte.
A li et as siens ert la porte
Deveee de Paradis;
Car icel gent si font lor vis
Amegrir, ce dit l'Evangile,
Por avoir loz parmi la vile,
Et por un poi de gloire vaine,
Qui lor toldra Dieu et son raine.

* * * * * *

_Comment le traistre Faulx-Semblant
Si va les cueurs des gens emblant,
Pour ses vestemens noirs et gris,
Et pour son viz pasle amaisgris._
'Trop sai bien mes habiz changier,
Prendre l'un, et l'autre estrangier.
Or sui chevaliers, or sui moines,
Or sui prelas, or sui chanoines,
Or sui clers, autre ore sui prestres,
Or sui desciples, or sui mestres,
Or chastelains, or forestiers:
Briement, ge sui de tous mestiers.
Or resui princes, or sui pages,
Or sai parler trestous langages;
Autre ore sui viex et chenus,
Or resui jones devenus.
Or sui Robers, or sui Robins,
Or cordeliers, or jacobins.
Si pren por sivre ma com