devant Gadres en
Esclavonie, si virent la cite fermee de halz murs et de
haltes torz, et pour noiant demandissies plus bele ne plus
fort ne plus riche. et quant li pelerin la virent, il se
merveillerent mult et distrent li uns a l'autre 'coment
porroit estre prise tel vile par force, se diex meismes nel
fait?' Les premieres nes vindrent devant la vile et
aencrerent et atendirent les autres et al matin fist mult
bel jor et mult cler, et vinrent les galies totes et li
huissier et les autres nes qui estoient arrieres, et
pristrent le port par force et rompirent la chaaine qui mult
ere forz et bien atornee, et descendirent a terre, si que li
porz fu entr'aus et la vile. lor veissiez maint chevalier et
maint serjant issir des nes et maint bon destrier traire des
huissiers et maint riche tref et maint pavellon.

Einsine se loja l'oz et fu Gadres assegie le jor de la saint
Martin. a cele foiz ne furent mie venu tuit li baron, ear
encor n'ere mie venuz li marchis de Montferrat qui ere remes
arriere por afaire que il avoit. Estiennes del Perche fu
remes malades en Venise et Mahis de Monmorenci, et quant il
furent gari, si s'en vint Mahis de Monmorenci apres l'ost a
Gadrez; mes Estienes del Perche ne le fist mie si bien, quar
il guerpi l'ost et s'en ala en Puille sejorner. avec lui
s'en ala Rotrox de Monfort et Ives de la Ille et maint
autre, qui mult en furent blasme, et passerent au passage de
marz en Surie.

L'endemain de la saint Martin issirent de cels de Gadres et
vindrent parler le duc de Venise qui ere en son paveillon,
et li distrent que il li rendroient la cite et totes les
lor choses sals lor cors en sa merci. et li dus dist qu'il
n'en prendroit mie cestui plet ne autre, se par le conseil
non as contes et as barons, et qu'il en iroit a els parler.

Endementiers que il ala parler as contes et as barons, icele
partie dont vos avez oi arrieres, qui voloient l'ost
depecier, parlerent as messages et lor distrent 'por quoi
volez vos rendre vostre cite? li pelerin ne vos assaldront
mie ne d'aus n'avez vos garde, se vos vos poez defendre des
Venisiens, dont estes vos quites.' et ensi pristrent un
d'aus meismes qui avoit non Robert de Bove, qui ala as murs
de la vile et lor dist ce meismes. Ensi entrerent li message
en la vi