deubt
combatre et assambler aux ennemis, il se print a seoir sur
l'une des bannieres du roy; dont on tint ce a grant
signiffiance de bien. Or approchierent les Flamens et
commenchierent a jetter et a traire de bombardes et de
canons et de gros quarreaulx empenez d'arain; ainsi se
commenca la bataille. Et en ot le roy de France et ses gens
le premier encontre, qui leur fut moult dur; ear ces
Flamens, qui descendoient orgueilleusement et de grant
voulente, venoient roit et dur, et boutoient en venant de
l'espaule et de la poitrine ainsi comme senglers tous
foursenez, et estoient si fort entrelachies tous ensemble
qu'on ne les povoit ouvrir ne desrompre. La fuirent du coste
des Francois par le trait des canons, des bombardes et des
arbalestres premierement mort: le seigneur de Waurin,
baneret, Morelet de Halwin et Jacques d'Ere. Et adont fut la
bataille du roy reculee; mais l'avantgarde et l'arrieregarde
a deux lez passerent oultre et enclouirent ces Flamens, et
les misrent a l'estroit. Je vous diray comment sur ces deux
eles gens d'armes les commencierent a pousser de leurs
roides lances a longs fers et durs de Bourdeaulx, qui leur
passoient ces cottes de maille tout oultre et les perchoient
en char; dont ceulx qui estoient attains et navrez de ces
fers se restraindoient pour eschiever les horions; ear
jamais ou amender le peuissent ne se boutoient avant pour
eulx faire destruire. La les misrent ces gens d'armes a tel
destroit qu'ilz ne se scavoient ne povoient aidier ne ravoir
leurs bras ne leurs planchons pour ferir ne eulz deffendre.
La perdoient les plusieurs force et alaine, et la
tresbuchoient l'un sur l'autre, et se estindoient et
moroient sans coup ferir. La fut Phelippe d'Artevelle encloz
et pouse de glaive et abatu, et gens de Gand qui l'amoient
et gardoient grant plente atterrez entour luy. Quant le page
dudit Phelippe vey la mesadventure venir sur les leurs, il
estoit bien monte sur bon coursier, si se party et laissa
son maistre, ear il ne le povoit aidier; et retourna vers
Courtray pour revenir a Gand.

(A)insi fut faitte et assamblee celle bataille; et lors que
des deux costez les Flamens furent astrains et encloz, ilz
ne passerent plus avant, ear ilz ne se povoient aidier.
Adont se remist la bataille du ro