le et fu li plais remes. Li dus de Venise com il
vint as contes et as barons, si lor dist 'seignor, ensi
voelent cil de la dedanz rendre la cite sals lor cors a ma
merci, ne je ne prendroie cestui plait ne autre se per voz
conseill non' et li baron li respondirent 'sire, nos vos
loons que vos le preigniez et si le vos prion.' et il dist
que il le feroit. Et il s'en tornerent tuit ensemble al
paveillon le duc por le plait prendre, et troverent que li
message s'en furent ale par le conseil a cels qui voloient
l'ost depecier. E dont se dreca uns abes de Vals de l'ordre
de Cistials, et lor dist 'seignor, je vos deffent de par
l'apostoile de Rome que vos ne assailliez ceste cite, quar
ele est de crestiens et vos iestes pelerin.' Et quant ce oi
li dus, si en fu mult iriez et destroiz et dist as contes et
as barons 'seignor, je avoie de ceste vile plait a ma
volonte, et vostre gent le m'ont tolu et vos m'aviez convent
que vos le m'aideriez a conquerre, et je vos semoing que vos
le facoiz.'
Maintenant li conte et li baron parlerent ensemble et cil
qui a la lor partie se tenoient, et distrent 'mult ont fait
grant oltrage cil qui ont cest plait desfet, et il ne fu
onques jorz que il ne meissent paine a cest ost depecier. or
somes nos honi, se nos ne l'aidons a prendre.' Et il vienent
al duc et li dient 'sire, nos le vos aiderons a prendre por
mal de cels qui destorne l'ont.' Ensi fu li consels pris; et
al matin alerent logier devant les portes de la vile, et si
drecierent lor perrieres et lor mangonials et lor autres
engins dont il avoient assez; et devers la mer drecierent
les eschieles sor les nes. lor commencierent a la vile a
geter les pieres as murz et as lors. Ensi dura cil asals
bien por v jors et lor si mistrent lors trencheors a une
tour, et cil commencierent a trenchier le mur. et quant cil
dedenz virent ce, si quistrent plait tot atretel com il
l'avoient refuse par le conseil a cels qui l'ost voloient
depecier.
JOINVILLE.
Au mois d'aoust entrames en nos neis a la Roche de
Marseille: a celle journee que nous entrames en nos neis,
fist l'on ouvrir la porte de la nef, et mist l'on touz nos
chevaus ens, que nous deviens mener outre mer; et puis
reclost l'on la porte et l'enboucha l'on bien, aussi comme
l'on naye un
|