ise leur donner la
permission de imprimer & vendre, ung livre, intitule Briefve & succincte
narration de la navigation, faicte es ysles de Canada & autres choses
y contenues: Pour lequel imprimer leur convient faire gros fraiz &
despens, dont ilz pourroient estre frustrez, ensemble de leurs labeurs,
s'il estoit permys a tous de l'imprimer. Ce considere il vous plaise &
ordonner que desfences soient faictes a tous libraires & imprimeurs de
la ville & prevoste de Paris, de ne imprimer icelluy livre, ny de en
vendre d'autre que de l'impression desdictz supplians, jusques a quatre
ans finiz & acrompliz, sur peine de confiscation desdictz livres &
d'amende arbitraire, Et vous ferez bien.

Il est permys ausdictz suppliens, avec les desfences a tous autres, de
ne imprimer le dict voyage pour le temps & espace de trois ans. Faict le
dernier jour de Febvrier, Mil cinq cens quarante quatre.

Ainsi signe, I. Morin.

[Page 2].

_AU ROY Treschretien_.

_Considerant, O mon tres-redoubte prince, les grandz bien & don de grace
qu'il a pleu a Dieu le Createur faire a ses creatures: Et entre lex
autres de mettre & asseoir le soleil, qui est la vie & congnoissance de
toutes icelles, et sans lequel nul ne peult fructifier ni generer en
lieu & place ou il a son mouvement, & declination contraire, & non
semblable es autres planettes. Par lesquelz mouvement & declinaison,
toutes creatures estans sur la terre en quelque lieu & place qu'elles
puissent estre, en ont, ou en peuvent avoir en lan dudict soleil, qui
est 365 jours et six heures, Autant de veue oculaire les ungs que les
autres, non qu'il soit tant chault & ardant es ungs lieux, que es autres
par ses raiz & reverberations, ny la division des jours & nuictz
en pareille esgallete: Mais suffit qu'il ayt de telle forte & tant
temperement que toute la terre est ou peult estre habitee en quelque
zone, climat, ou paralelle que ce soit: Et icelles avecques les eaues,
arbres, herbes, & toutes autres creatures de quelques genres ou especes
qu'elles soient par l'influence d'iceluy soleil, donner fruictz &
generations selon leur nature par la vie & nourriture des creatures
humaines. Et si aucuns vouloient dire le contraire de ce que dessus, en
alleguant ledict des saiges philosophes du temps passe, qui ont escript
& faict division de la terre par cinq zones, dont ilz dient & afferment
trois inhabitees. Cest assavoir la zone torride, qui est entre les deux
tropiques ou solstices, qui pass