urent deux moys sans retourner. Au moyen dequoy eusmes
suspicion qu'ilz ne feussent aller amasser grand nombre de gens
pour nous faire desplaisir, parce qu'ilz nous veoient si affoibliz,
nonobstant que avions mys si bon ordre a nostre faict, que si toute la
puissance de leur terre y eust este, ilz eussent sceu faire autre chose
que nous regarder. Et pendent le temps qu'ilz estoient dehors, venoient
tous les jours force gens a noz navires, comme ilz avoyent de coustume,
nous apportant de la chair fresche de Cerfz & Dains, poissons fraiz
de toutes sortes: Lesquelz ilz nous vendoient fort cher, ou autrement
myeulx aymoient l'emporter, parce qu'ilz avoyent necessite de vivres
pour lors, a cause de l'yver qui avoit este long.

_Comment Donnacona revint a Stadacone avec grand nombre de gens & feist
ledict Donnacona du malade de peur de venir veoir le cappitaine, cuydant
que ledict cappitaine allast vers luy_.

Le vingt & ungiesme jour dudict moys d'Avril, Dom Agaya vint a bort
accompagne de plusieurs gens lesquelz estoient beaulx & puissans.
Et n'avions accoustume de les veoir: lesquelz dient que le seigneur
Donnacona feroit le lendemain venu: & qu'il apporteroit force cher de
cerfz & autre venaison. Et le lendemain vingt deuxiesme jour dudict moys,
vint le dict Donnacona, lequel admena en sa compaignie grand nombre de
gens audict Stadacone, ne scavions a quelle occasion, n'y pourquoy: mais
on dict a ung proverbe, qui de tout se garde de aucuns eschappe. Ce que
nous estoit de necessite; Car nous estions si affoibliz tant de maladie
que de gens mors, qu'il nous a fallu laisser ung de noz navires audict
lieu de saincte Croix. Le cappitaine estant adverty de leur venue, &
qu'ilz avoient admene tant de gens: & aussy que Dom Agaya le vint dire
au cappitaine, sans vouloir passer la riviere qui seroit entre nous
& ledict stadacone: ains feist difficulte de passer, Ce que n'avoit
acoustume de faire, qui nous donna doubte de trahison. Voyant ce, le
cappitaine envoya son serviteur accompaigne de Jehan poullet, lesquelz
estoient plus que nulz aultres aymez dudict peuple du pais, pour veoir
que estoit audict lieu,& qu'ilz faisoient, faignans les dictz [Page 40]
poullet & serviteur estre aller veoir ledict Donnacona, parce qu'ilz
avoient este longuement avec luy a leur ville lesquelz luy porterent
aucun petit present. Et lors que ledict Donnacona fut adverty de leur
venue, feist le malade & se couche: Apres allerent en la maison de
Tai