mbre de gens decedez depuis le
commencement de la maladie jusques a la my Mars_.

Depuis la my Novembre jusques au quinziesme jour d'Apvril, avons este
continuellement enfermez dedans les glaces, lesquelles avoient plus de
deux brasses d'espesseur. Et dessus la terre avoit la haulteur [Page 37]
de quatre piedz de neiges & plus, tellement qu'elle estoit plus haultes
que les bortz de noz navires: lesquels les ont dure jusques audict
temps, en sorte que nos breuvages estoient tous gellez dedans les
fustailles, Et par dedans nosdictes navires tant de bas que de hault,
estoit la glace contre les bortz a quatre doigtz d'espesseur. Et estoit
tout le dict fleuve, par autant que l'eaue doulce en contenoit jusques
au dessus dudict Hochelaga gelle: durant lequel temps nous deceda
jusques au nombre de vingt cinq personnes des principaulx & bons
compaignons que nous eussions: Et pour l'heure y en avoit plus de
cinquante, en qui on esperoit plus de vie & le parsus tous malades
que nul n'en estoit exempte excepte trois ou quatre: Mais dieu par sa
saincte grace nous regarda en pitie: & nous envoya la congnoissance
& remede de nostre guarison & sante de la sorte & maniere qu'il sera
devise en ce chapitre.

_Comment par la grace de dieu nous eusmes congnoissance de la sorte
d'ung arbre, par lequel nous avons este guariz apres avoir use dudict
arbre, & la facon d'en user_.

Ung jour nostre cappitaine voyant la maladie si esmeue & ses gens si
fort esprins d'icelle, estant sorty dehors du fort, Et soy promenant sur
la glace, apperceust venir une bende de gens de Stadacone, en laquelle
estoit Dom agaya, lequel le cappitaine avoit veu dix ou douze jours
auparavant fort malade de ladicte maladie que avoient ses gens. Car il
avoit l'une des jambes par le genoul aussy grosse qu'ung enfant de deux
ans. Et tout les nerfz d'icelle retirez: les dentz perdues & gastees, &
les gensives pourries & infectees.

Le cappitaine voyant ledict Dom agaya sain & delibere feust joyeulx
esperant par luy scavoir comme il estoit guary: Affin de donner ordre
& secours a ses gens. Lors qu'ilz furent arrivez pres le fort, le
cappitaine luy demanda comme il s'estoit guary de sa maladie: lequel Dom
agaya respondit qu'il avoit le jus & le marcq des fueilles d'ung arbre
dont il s'estoit guary, & que c'estoit le singulier remede pour maladie.
Ledict cappitaine luy demanda s'il y en avoit point la entour, & qu'il
luy en monstrast pour guarir son serviteur qui avoit prin