nd toutes en
une. Celuy jour feusmes a l'une d'icelles, ou trouvasmes cinq hommes qui
prenoient des bestes sauvaiges: lesquels vindrent aussi privement a noz
barques, que s'ilz nous eussent veu toute leur vie sans avoir peur ne
craincte, & nosdictes barques arrivez a terre, l'un d'iceulx hommes
print nostre cappitaine entre ses bras, & le porta a terre aussy
legierement que sy feust este ung enfant de cinq ans, tant estoit
icelluy homme grand & fort. Nous leur trouvasmes ung grand mouceau de
raz sauvaiges: lesquelz vivent en l'aue, & sont gros comme connyns, &
bons a merveilles. Desquelz feirent present a nostre cappitaine, qui
leur donna des couteaulx, & patenostres pour recompence. Nous leur
demandasmes par signe, si c'estoit le chemin de Hochelaga: Ilz nous
monstrerent que ouy, & qu'il y avoit encores trois journees a y aller.
_Comment le cappitaine feist accoustrer les barques pour aller audict
Hochelaga, & laisserent le gallyon pour la difficulte du passaige: &
comment nous arrivasmes audit Hochelaga, & le racueil que le peuple nous
feist a nostre arrivee_.
Le lendemain nostre cappitaine voyant qu'il n'estoit possible povoyr
pour lors passer le dict gallyon, feist advictailler & accoustrer
les barques, & mettre victuailles pour le plus de temps qu'il feust
possible, & que lesdictes barques en peurent accueillir, & se partit
avecques icelle accompaigne des gentilz hommes: scavoir Claude [Page 22]
du pont grand echanson de monseigneur le Dauphin. Charles de la
Pommeraye, Jehan gouion, Jehan poullet, avec vingt huict marinyers, y
comprins Mace jallobert & Guillaume le breton, ayans la charge soubz le
cappitaine des deux autres navires, pour aller amond ledict fleuve, au
plus loing qu'il nous seroit possible. Et navigasmes de temps a gre
jusques au dixneufiesme jour d'Octobre, que nous arrivasmes audict
Hochelaga, qui est distant d'ou estoit demoure ledict gallyon, de
quarante cinq lieues. Auquel & chemin faisant trouvasmes plusieurs gens
du pays, lesquelz nous apportoient du poisson & aultres victuailles,
dansans & menans grand joye de nostre venue. Et pour les atraire & tenir
en amytie avec nous, leur donnait ledict cappitaine pour recompence,
des couteaulx, patenostres & autres menues choses, dequoy estoient fort
contens. Et nous arrivez audict Hochelaga, Se rendirent au devant de
nous plus de mil personnes, tant hommes femmes que enfans; Lesquelz nous
feirent aussy bon racueil, que jamais pere feist a enfant,
|