roist de aussi beau chanvre que celuy de France, qui
vient sans semence ny labour. Apres avoir visite ledict lieu, & trouve
estre convenable, se retira ledict cappitaine, & les aultres dedans les
barques pour retourner es navires. Et ainsi que sortismes hors de la
dicte riviere trouvasmes au devant de nous l'ung des seigneurs dudict
peuple de Stadacone accompaigne de plusieurs gens tant hommes, femmes
que enfans: lequel seigneur commenca a faire ung preschement a la facon
& mode du pays, qui est de joye & asseurance, & les femmes dansoient
& chantoient sans cesse estans en l'eaue jusques es genoulx, Nostre
cappitaine voyant leur bonne amour & bon vouloir, feist approcher la
barque ou il estoit, & leur donna des couteaulx, & petites patenostres
de voirre, de quoy menerent une merveilleuse joye, de sorte que nous
estans departis d'avec eulx distant d'une lieue ou environ, les oyons
chanter, danser, & mener joye de nostre benne.

_Comme nostre cappitaine retourna es navires & alla veoir l'ysle, la
grandeur & nature d'icelle, & comme il feist mener les dict navires a la
riviere saincte Croix_.

Apres que nous feusmes arrivez avec noz barques ausdictz navires &
retournez de la rivyere saincte Croix, le cappitaine commanda apprester
lesdictes barques pour aller a terre a la dicte ysle veoir les arbres
qui sembloient fort beaulx a veoir, & la nature de la terre d'icelle
ysle. Ce que fut faict, & nous estans a ladicte ysle la trouvasmes
plaine de fors beaulx arbres de la sorte des nostres. Et pareillement y
trouvasmes force vignes, ce que n'avyons veu par cy devant a toute la
terre, & par ce la nommasmes l'ysle de Bacchus. Icelle ysle [Page 15]
tient de longueur environ douze lieues, & est fort belle terre a veoir,
mais est plaine de boys sans y avoir aucun labouraige, fors qu'il y a
aucunes petites maisons ou ilz font pescherie, comme par cy devant est
faicte mention.

Le lendemain partismes avec nosdictz navires pour les mener audict lieu
de saincte Croix, & y arrivasmes le 14 dudict moys. Et vindrent au
devant de nous le lesdictz Donnacona Taignoagny & Dom agaya avec vingt
cinq barques chargez de gens qui venoient dudict lieu dont estions
partis, & alloient audict Stadacone ou est leur demourance, & vindrent
tous a noz navires faisans plusieurs signes de joye, fors noz deux
hommes que avions apportez, Scavoir Thaignoagny & Dom agaya, lesquelz
estoient tous changez de propos, & de couraiges, & ne vouloient entrer
dedens