u'ilz fouloient faire, & commence le dict Taignoagny a saluer nostre
cappitaine qui luy demanda s'il vouloit le bateau, lequel luy respondist
que non pour l'heure, mais que tantost il entreroit dedans lesdictes
navires & incontinent arriva ladicte barque ou estoient lesdictz trois
hommes apparoissant estre trois diables ayans de grandz cornes sur leurs
testes, & faisait celuy du milieu ung merveilleux sermon en venant:
lesquelz passerent le long de noz navires avec leur dicte barque, sans
aucunement tourner leur veue vers nous, & allerent assener & donner
en terre avec leur dicte barque, & tout incontinent ledict seigneur
Donnacona & des gens prindrent ladicte barque & lesditz trois hommes,
lesquelz s'estoient laisse cheoir au fondz d'icelle comme gens morts, &
porterent le tout ensemble dedans le boys qui estoit distant d'ung jet
de pierre, & ne demoura une seulle personne devant nosdictes navires que
tous ne se retirassent dedans ledict boys, & eulx estans audict boys
commencerent une predication & preschement que nous oyons de noz navires
qui dura environ demye heure. Apres laquelle sortirent les dictz
Taignoagny & Dom agaya marchans ver nous, ayans les mains joinctes, &
leurs chappeaulx soubz leurs coddes, faisans une grande admiration. Et
commenca le dict Taignoagny a dire, & proferer par trois _Jesus, Jesus,
Jesus_ levant les yeux vers le ciel, puis Dom agaya commenca a dire
_Jesus Maria_. Jacques Cartier regardant vers le ciel comme l'aultre.
Le cappitaine voyant leurs mines & cerimonies, leur commenca a demander
qu'il y avoit, & que c'estoit que estoit survenu de nouveau, Lesquelz
respondirent qu'il y avoit de piteuses nouvelles, en disant, nenny, est
il bon. Et ledict cappitaine leur demanda de rechef que c'estoit: &
ilz repondirent, que leur dieu nomme Cudragny avoit parle a [Page 19]
Hochelaga, & que les trois hommes devant dictz estoient venus de par luy
leur annoncer les nouvelles, qu'il y avoit tant de glaces & de neiges
qu'ilz mouroient tous. Desquelles parolles nous prinsmes tous a rire,
& leur dire que leur dieu Cudragny n'estoit que ung sot, & qu'il ne
scavoit qu'il disoit, & qu'ilz le disent a ses messagiers, & que Jesus
les garderoit bien de froid s'ilz luy vouloient croire. Lors dedict
Taignoagny & son compaignon, demanderent audict cappitaine s'il avoit
parle a Jesus, & il respondist que ses prebstres y avoient parle, &
qu'il feroit beau temps. Desquelles parolles remercierent le dict
cappitaine, & s