nt qu'il es mort
de noz gens jusques au nombre de vingt cinq_.

Au moys de Decembre feusmes advertis que la mortalite s'estoit mise
au peuple de Stadacone, tellement que ja en estoient mors par leur
confession plus de cinquante. Au moyen de quoy leur deffendismes nostre
fort, & ne venir entour nous: mais nonobstant les avoir chassez commenca
la maladie entour nous d'une merveilleuse sorte, & la plus incongneue:
car les ungs perdoient la substance, & de leur devenoient les [Page 35]
jambes grosses & enflez & les nerfz retirez & noirciz comme charbon, &
a aucuns toutes fermees de gouttes de sang comme pourpre: puis montoit
ladicte maladie aux hanches, cuisses & espaulles, aux bras & au col. Et
a tout venoit la bouche si infecte & pourrye par les gensyves, que tout
la chair en tumboit jusques a la racine des dentz, lesquelles tumboient
pres que toute. Et tellement se esprit la dicte maladie a noz trois
navires, que a la my Febvrier de cent dix hommes que nous estions il n'y
en avoit pas dix sains, en sorte que l'ung ne pouvoit secourir l'aultre
qui estoit chose piteuse a veoir, considere le lieu ou nous estions. Car
les gens du pays venoient tous le jours devant nostre fort, qui peu de
gens veoyent, & ja y en avoit huict de mors & plus de cinquante, en qui
on ne esperoit plus de vie.

Nostre cappitaine voyant la pitie & maladie ainsi esmeue, feist mettre
le monde en prieres & oraisons & feist porter ung ymage en remembrance
de la Vierge Marie contre ung arbre distant de nostre fort d'ung traict
d'arc les travers des neiges & glaces. Et ordonna que le dimenche
en suyvant l'on diroit audict lieu la messe. Et que tous ceulx qui
pourroient cheminer tant sains que malades yroient a la procession
chantant les sept pseaulmes de David avec la letanie, en priant ladicte
vierge qu'il luy pleust prier son cher enfant qu'il eust pitie de nous.
La messe dicte & celebree devant ledict ymage, se feist le cappitaine
pelerin a nostre dame de Roquemado promettant y aller si Dieu luy
donnoit grace de retourner en France. Celuy jour trespassa Philippes
Rougemont natif d'Amboise, de l'aage de environ vingt deux ans.

Et pour ce que la maladie nous estoit incongneue, feist le cappitaine
ouvrir le corps pour veoir si aurions congnoissance d'icelle pour
preserver si possible estoit, le persus. Et feust trouve qu'il avoit
le coeur blanc & fletry environe de plus d'ung pot d'eaue rousse comme
dacte, le foye beau, mais avoit le poulmon tout noircy