es hachotz comme des cousteaulx pour ce quilz
nous bailloient, nonobstant que le cappitaine leur eust faict beaucoup
de presens & si ne cessoient a toutes heures de demander audict
capitaine. Lequel fut adverti par ung seigneur de la ville de
Hagonchenda quil se donnast garde de Donnaconna & desdicts deux meschans
& quilz estoient agoinda qui est a dire traitres. Et aussi en fut
adverty par aucuns dudit Canada, & aussi que nous apperceusmes de leur
malice parce quilz voulloient retirer les trois enfans que ledict
Donnacona avoit donnez audict cappitaine, & de faict firent fuyr la
plus grande des filles du navire. Apres laquelle ainsi fuye fist le
cappitaine prandre garde es aultres. Et par l'advertissement desdicts
Taignoagny & Dom Agaya, se abstenoient & depportoient de venir avec
nous quatre ou cinq jours, sinon aulcuns qui venoient en grand paour &
crainte.

_Comment le cappitaine doubtant quilz ne songassent aucune trahison fist
renforcer le fort & comment ils vindrent parlementer avecques luy & la
rendition de la fille qui sen est fuye_.

Voyant la malice deulx, doubtant quils ne songeassent aucune trahison &
venir avecques ung amast de gens sur nous, le capitaine fit renforcer
le fort tout a lentour de groz fossez larges & profondz avec porte a
pont-leviz & renffort de pans de boys au contraire des premiers. Et fut
ordonne pour le guet de la nuyt pour le temps advenir cinquante hommes
a quatre quars & a chascun changement desdicts quars les trompettes
sonnans ce qui fut faict selong ladicte ordonnance. Et lesdicts
Donnacona Taignoagny & Dom Agaya estans advertiz dudict renffort & de la
bonne garde & guet que lon faisoit furent courroucez destre en la male
grace du cappitaine & envoyerent par plusieurs fois de leurs gens
faignant quilz feussent dailleurs pour veoir si on leur feroit
desplaisir desquelz on ne tint compte & nen fut faict ny monstre aucun
semblant. Et y vindrent lesdicts Donnacona Taignoagny, Dom Agaya &
aultres plusieurs fois parler audict cappitaine une riviere entre
d'eulx, demandant audict cappitaine sil estoit marry & pourquoy il
nalloit a Canada les veoir. Et ledict cappitaine leur respondit quilz
nestoient que traitres & meschans ainsi que on luy avoit rapporte, &
aussi quil avoit apperceu en plusieurs sortes comme de navoir tins
promesse de aller a Hochelaga & de avoir retire la fille que on luy
avoit donnee, & aultres mauvais tours quil leur nomma; mais pour tout
ce que silz voulloient es