secutione Christianorum tendente cum pleno exercitu per hunc locum,
et Christianis tyrannidem eius fugientibus, contigit ex improuiso eos ita
arctari, vt se effugere desperarent, quapropter statim ad orationis
refugium omnes se sternentes clamauerunt ad Christum auxiliatorem suum: Et
deus, qui pro puro corde Christianos ad se orantes semper exaudit, expleuit
illic literam vaticinij Isaiae: quia ecce tenebrae operient terram et caligo
populos, monstrans per tenebram terrenam, quam eis superduxit, quas passuri
essent inimici nominis Christi tenebras infernales, indicansque per
temporalem vitam, quam sibi fidelibus conseruauit, eam quam possessuri sunt
viri Christiani vitam perpetuam, et coelestem.

Itaque hoc regnum Abchaz ad occidentem sui iungitur regno Turciae, quod in
longo et lato valde extensum multas continet prouincias scilicet Iconiae,
Cappadociae, Saurae, Brike, Besicon, Patan, et Gennoch; hij omnes Turci, cum
tota Syria et Arabia vsque ad Galliziam Hispaniae, subsunt Imperatori
Babyloniae Soldano, et sunt in singulis prouinciis et regionibus ciuitates
magnae, ac multae nimis. Consequenter huic regno Turciae ad Occidentem sui in
ciuitate Cathasa [Marginal note: Vel Sathata.] iungitur per mare Greciae
superior pars potestatis Imperatoris Constantinopolitani, et quasi ad
Aquilonem contiguatur regno Syriae: cuius vna prouincia est terra
promissionis, prout hoc satis dictum est supra. Sunt et aliae terre, et
Insulae, et patriae latae, et spatiosae, continentes in se multa regna, et
reges, et gentes diuersas, de quibus nunc per singula pertractare non est
consilij.

Ad supradictam Chaldaeam iungitur Mesopotamia, et minor Armenia, et velut ad
Austrum eius AEthiopia, Mauritania, Lybia alta et bassa, et Nubia.
[Sidenote: Extensio Imperij Grand Can.] Excepto ergo duntaxat districtu
Imperij Persiae, et potestate Soldani, omnes saepe pertractatae terrae,
regiones, regna et Insulae descendendo tam par Aquilonem, quam ad Austrum a
prouincia Cathay, vsque ad Christianitatem sunt de Imperio Tartariae Grand
Can. [Sidenote: Distantia a Roma ad Cathayam per Institores.] Et notandum
de spacio distantiae, quod institores de Roma, vel Venetia festinantes tam
per terras, quam per mare, expendunt de tempore 11. menses, et quandoque
duodecim, priusquam in Cathay valeant peruenire.

Hijs itaque visis describam saltem aliquas a prouincia Cathay in orientem
terras Imperij Tartarorum. [Sidenote: Cadilla Regio orientalior Cathay.
Angli nos