Grifo nur kuris pli rapide. Dume sekvis ilin--pli kaj pli
mallauxte--la vocxo de la Falsa Kelonio finanta per tre melankoliaj
tonoj la rekantajxon:

_Su-upo ve-espera! Supo ve-espera!
Bela, ho bela vi Sup'!_

CXAPITRO XI

KIU FORSXTELIS LA TORTOJN?

Kiam ili alvenis, la Keraj Geregxoj jam sidis sur sia trono,
cxirkauxite de granda amaso da bestetoj kaj birdetoj, ankaux la tuta
aro da ludkartoj.

Jen antaux la trono staris la Lakeo; li havis la manojn kunligitajn
per granda fercxeno, kaj gardis lin du soldatoj, cxiuflanke po unu.
Apud la Regxo staris la Blanka Kuniklo; en la dekstra mano tiu cxi
havis trumpeton, kaj en la maldekstra li portis grandan rulajxon
pergamenan. En la mezo de la jugxejo estis tablo, kaj sur la tablo
Alicio ekvidis grandan pladon plenan je tortoj. Tian allogan aspekton
ili havis, ke nur surrigardi ilin funkciigis la salivglandojn. "Mi
tre volas," pensis sxi, "ke oni tuj finu la proceson kaj disdonu la
tortojn."

Tamen, konkludinte el la mienoj de la cxeestantoj ke tio _ne_ okazos,
sxi--por pasigi la tempon--komencis cxirkauxrigardi.

Gxis la nuna momento neniam en la tuta vivo sxi cxeestis jugxejon;
tamen sxi estis _iom_ leginta pri tiaj aferoj, kaj tre kontente sxi
konstatis ke sxi povas facile identigi preskaux cxion en la cxambro.

"Jen," sxi komencis, "sub la granda peruko, jen la jugxisto."

Sendube! Sed li estis ankaux la Regxo, kaj cxar li portis la kronon
super la peruko (se vi volas vidi _kiel_, vidu la ilustrajxon sur
pagxo 120 [LA KUIRISTINO RIFUZAS ATESTI.]) li havis la aspekton esti
tre malkomforta; ankaux la krono certe ne sidis konvene.

"Kaj jen," pensis Alicio dauxrigante la klasifikon, "la
_jxurintarejo_, kaj jenaj dekdu kreitajxoj--sxi nepre devis uzi tiun
vorton, cxar unuj ja estis bestoj, kaj aliaj estis birdoj--supozeble
estas la _jxurintoj_."

Sxi du, tri fojojn ripetis la vortojn "jxurintoj, jxurintarejo," cxar
sxi kredis, kaj ja rajtis kredi, ke nur tre malmultaj knabinetoj sxiaj
samagxuloj havas pri tiuj vortoj ian ajn ideon.

La dekdu jxurintoj skribadis (cxiuj senescepte) sur ardezajxoj.

"Kion ili faras?" sxi flustris al la Grifo, "ja antaux komenco de la
proceso, ili nepre nenion povas havi por skribi."

"Ili skribas cxiu sian propran nomon," la Grifo mallauxte respondis,
"pro la timo ke antaux la finigxo de l' proceso ili forgesos gxin."

"La stultuloj!" Ali