kvazaux atendadis iun aux ion. En la komenco
de la dua duono de la balo, post la granda internacia kontrauxdanco, sxi
farigxis tre serioza kaj enpensa. Ekuzinte pauxzon inter la dancoj, mi,
movata per scivoleco, nerimarkeble alproksimigxis al sxi kaj demandante
ekrigardis en sxiajn okulojn--kaj en tiuj cxi belegaj okuloj mi ellegis
alarmon.

--Ni iru en la bluan kabineton--diris sxi al mi murmurete--mi devas fari
al vi gravan komunikon....

Mi humile sekvis post sxi. Kiam ni okupis liberan kanapon, sxi timeme
rerigardis cxirkauxe kaj, fleksigxinte al sama mia orelo, ekmurmuretis.

--Cxu vi scias, s-ro Siksten, Jxoli jxus, en la tempo de la lasta
kontrauxdanco proponis al mi sian koron kaj manon....

--Mi preskaux sciis tion cxi--respondis mi, penante sxajni trankvila.--Sed
kio do el tio cxi sekvas?

--Mi dezirus scii vian opinion pri tio cxi.

--Mian opinion?--respondis mi sen gxeno--mia opinio estas tia, ke, se vi
demandas mian opinion, sekve vi lin ne amas kaj sekve vi devas al li
rifuzi.

Karolino rigardis sur min el post la ventumilo per tia rigardo, kvazaux
sxi penis difini, cxu miaj vortoj estis nur logika silogismo, aux
rezultato de ia malica celo.

--S-ro Jxoli--diris sxi--prezentas belegan partion en cxiuj rilatoj kaj,
se mi turnas min al via opinio t.e. laux via esprimo, se mi....
sxanceligxas--gxi estas kulpo de unu bone konata al vi persono, kiu,
malgraux cxio, min gxis nun.... tre interesas.... Mi promesis al s-ro
Jxoli doni lastan respondon gxuste post semajno de hodiauxa balo, kaj
nun.... mi devas per tia aux alia maniero ekzameni.... miajn sentojn....
al tiu.... al via amiko....

Sed en tiu cxi loko nia parolado estis interrompita per ia eleganta
esperantisto, subkurinta al Karolino kun invito al rondo de valso...."

Por Monblero tio cxi estis tro multa. Flamigadata per la sciigoj de
Siksten, li en la lasta tempo iradis kiel en haladzo; longedauxra interna
batalado inter la deziro ekvidi Karolinon kaj timo de tiu cxi renkonto lin
tre senfortigadis, li perdis internan egalpezon, forjxetis siajn okupojn
kaj ecx tre malgrasigxis. La lasta sciigo pri Karolino elkondukis lin el
rigideco; li subite decidigxis je cxio; estis donita al li semajno da
tempo kaj oni ne povis malrapidi unu minuton.

La telegrafa metalfadeno transdonis al Siksten sekvantan sciigon:--Mi
veturas en N-n. Renkontu min en la stacidomo morgaux je la kvara horo
post tagmezo. Mi alveturos prezentigxi al s-ro M. kaj lia familio.