ng boy,
that will have three schillingis of fye, a sark, and payre of schone in
the year. And thairfoir, yf thair curssing dow any thing, we held the
Bischoppis beast chaip servandis, in that behalf, that ar within the
realme." As concernyng miracles, he declaired, what diligence the
ancientis took to try trew miracles frome false. "But now, (said he,)
the greadynes of preastis not onlie receave false miracles, bot also
thei cherise and feis knaiffis for that purpoise, that thair chapellis
may be the better renouned, and thair offerand may be augmented. And
thairupoun ar many chapelles founded, as that our Lady war mychttiar,
and that sche took more pleasour in one plaice then in ane uther; as of
laite dayis our Lady of Karsgreng hes hopped fra ane grene hillock to
ane uther. But honest men of Sanctandrose, (said he,) yf ye luif your
wyffis and your doughtaris, hald thame at hame, or ellis send thame in
honest companye; for yf ye knew what miracles war kithed thaire, ye wold
neyther thank God nor our Lady." And thus he mearelie tanted thare
trystis of hurdome and adulterye used at such devotioun.

Ane uther article was judged more hard; for he alledged the commoun
law,[79] That the Civyle Magistrate mycht correct the Churchmen,[80] and
deprive thame of thaire benefices, for oppin vices.

Ane uther day, the same Frear maid ane uther sermoun of the Abbote [of]
Unreassone,[81] unto whome and whose lawis he compared the prelattis of
that age; for thei war subdewid to no lawis, no moir then was the Abbote
[of] Unreassoun. And amonges uther thingis he told such a meary bourd.
"Thare was (said he) a Prelatt, or at least a Prelattis peir, a trew
servand to the King of luif, who, upoun a nycht after suppar, asked at
his gentillmen, be the fayth that thei awght to the king of luif, that
thei should trewlie declare how many syndrie wemen everie ane of thame
had haid, and how many of thame war menis wyffis. Ane answered, He had
lyne with fyve, and two of thame war maryed. The other answered, I have
haid sevin, and three of thame ar maryed. It came at last to my Lord
him self, who macking it veray nyce for a lytill space, gave in the end
ane plain confessioun, and said, 'I am the yongest man, and yitt have I
haid the round desone; and sevin of thame ar menis wyffis.' Now, (said
the Frear,) this god and king of luif, to whome our Prelaittis maikis
homage, is the maistir devill of hell, from whome such werkis and
fruitis doo procead.