his entreprise, comyng before the noble cite of Paris, with alle his
roialle power to have entred the said cite, and to put out youre saide
cosyn duke of Bedford; whiche havyng knowlege therof incontinent disposed
hym (albeit he had upon so soden warnyng but a few felouship) to mete ayen
withe youre saide adversarie, and put hym in gret aventure, and entred in
youre saide cite of Paris to relief and defende theym as he promised, and
sent worde unto hem late before to theire grettist yoie and comfort. And
youre said adversarie, that ententid to gete the saide cite, besieging
theym withe a grete nombre, mightilie resisted withe men and ordenaunce, so
grevously hurt, being fayne to voide incontinent.
And as in this maner it shewithe evidently that youre true obeisaunt
lordis, and noble chieveteins, also true subgettis, have abandonned theire
bodies, putting them in gret jupardie unto the parelle of dethe, or to be
taking prisoneris, and yet God hathe served hem soo, that thoroughe His
grace and theire manhod withe wise governaunce [they] have had the
overhande of youre adversaries, and kept bothe the saide citee and the
feelde withe other good men that aboode, whan theire partie contrarie have
ben nombred double or treble {48} moo than youris, as is before expressid.
And at whiche tyme the saide citee was so mightly besegid, ser John Radclif
knight, withe his felouship, had gret worship.
[Sidenote: Exclamacio.]
[Sidenote: Nota. 1449, 1450.]
[Sidenote: Tempus ultimi conquestus.]
[Sidenote: De pace finali apud Bretygnye.]
[Sidenote: .1371.]
O ye right noble martirs! whiche that for youre verray righte of the
coroune of Fraunce, and for the welfare of the kingis highenesse, and for
the worship of his bothe roiaumes of Englond and Fraunce, ye forto susteyne
righte and forto wynne worship, have ben often put in gret aventure, as was
often tymes of the worshipfulle Romayns. And therfore of you may be saide
that ye were alway stedfast and obeieng youre souvereyn unto the jupardie
and perille of dethe. So wolde Jhesus that in the brief seson of the
sodeyne and wrecchid intrusion late had by the unmanly disseising and
putting oute of Fraunce, Normandie, Angew, and Mayne, withe the duchies of
Gasquien and Guyen, whiche is done bethin the space of .j. yere and .xiiij.
wekis, that is to wete frome the .xv. day of Maij in the yere of Crist
M^l.cccc.xlix. unto the .xv. day of the monithe of August the yere of Crist
M^l.ccc
|