rovyded and ordeined oughte not be long delaied,
but incontinent stedfastlie to be persevered, that then doubte not but that
God, whiche is most mercifulle and allway in every necessite to relief us,
despraisithe not the humble and contrite hertis, but that he of his
infinite goodenesse wolle accept and take in gree and his grace oure good
entent, and shalbe withe us in alle oure gode actis and dedis.
How over gret cost and pomp in clothing shulde be eschewed.
And therfore in witnesse herof eschew and leve the superfluite and excesse
of arraie and clothing. And late everie astate use as {80} the worthie
Romains did, the whiche, in tyme of affliccions and turmentis or anguisshes
by occasion of werres and batailes, used one manere clothing, and anothir
maner clothing in tyme of prosperite and felicitee reignyng. And the same
maner the ryte and custom of youre adverse partie of Fraunce hathe used,
escheweng alle costius arraiementis of clothing, garmentis, and bobauncees,
and the usaige of pellure and furres they have expresselie put away. Whiche
costues arraymentis and disgising of clothing of so many divers facion used
in this youre roiaume, inespecialle amongis youre pore comyners, hathe be
one of the gret inconvenientis of the empoverisshing of youre lande, and
enforced gret pride, envy, and wrathe amongis hem, whiche hathe holpe
broughte them to gret indigence and povertee.
How that gret hurt and inconvenientis have fallen to the roiaume because
the creditours have not been duelie paide of here lonys and prestis made to
highe sovereins.
[Sidenote: Nota optime.]
Moreover, youre pore comyns, [yn your antecessour dayes,[181]] not paied
holy theire duteis for theire lones, prestis of vitailis and othir
marchaundise, as by opyn example was often tymes lent and taken to the
behofe of youre predecessoure Henry sext, named king, but in sondrie wises
be delaied and despende gret part of her goode, or they can nighe her
deutees and paiementis, and fayn to suffre to defalke and relese partie of
her dutee to receyve the othir part, whiche is the cause of gret charge and
hinderaunce of youre peple. And therefore, to voide this inconvenient,
righte noble king, withe the discrete avise of youre noble lordis, let
youre riche tresours be spradde and put abrode, bothe juellis, vesselle of
gold and silver, among youre true subgettis, and inespecialle to the helpe
and avauncement of youre conquest, and to the relief of youre indi
|