nde,
In the way of good company.

_Everyman._ That was well spoken and lovyngly.

_Felawshyp._ Syr, I must nedes knowe your hevynesse.
I have pyte to se you in ony dystresse.
If ony have you wronged ye shall revenged be,
Though I on the grounde be slayne for the,
Though that I knowe before that I sholde dye.

_Everyman._ Veryly, Felawshyp, gramercy.

_Felawshyp._ Tusshe, by thy thankes I set not a strawe,
Shewe me your grefe and saye no more.

_Everyman._ If I my herte sholde to you breke,
And than you to tourne your mynde fro me,
And wolde not me comforte whan ye here me speke,
Then sholde I ten tymes soryer be.

_Felawshyp._ Syr, I saye as I wyll do in dede.

_Everyman._ Than be you a good frende at nede,
I have founde you true herebefore.

_Felawshyp._ And so ye shall evermore,
For, in fayth, and thou go to hell
I wyll not forsake the by the waye.

[EVERYMAN _now explains his need for a companion along the road to
the next world._]

_Felawshyp._ That is mater in dede! Promyse is duty,
But and I sholde take suche vyage on me,
I knowe it well, it sholde be to my payne;
Also it make me aferde, certayne.
But let us take counsell here as well as we can,
For your wordes wolde fere a stronge man.

_Everyman._ Why, ye sayd, yf I had nede,
Ye wolde me never forsake, quycke ne deed,
Though it were to hell, truely.

_Felawshyp._ So I sayd certaynely,
But suche pleasures be set a syde, the sothe to saye;
And also, yf we toke suche a journaye,
Whan sholde we come agayne?

_Everyman._ Naye, never agayne, tyll the daye of dome.

_Felawshyp._ In fayth, than wyll not I come there.
Who hath you these tydynges brought?

_Everyman._ In dede, deth was with me here.

_Felawshyp._ Now, by God that all hathe bought,
If deth were the messenger,
For no man that is lyvynge to daye
I wyll not go that lothe journaye,
Not for the fader that bygate me.

_Everyman._ Ye promysed other wyse, parde.

_Felawshyp._ I wote well I say so, truely,
And yet yf thou wylte ete and drynke and make good chere,
Or haunt to women, the lusty company,
I wolde not forsake you whyle the day is clere,
Trust me ve