e springs,
Awa ye squatter'd like a drake
On whistlin' wings.

Let warlocks grim an' wither'd hags
Tell how wi' you on ragweed nags [ragwort]
They skim the muirs an' dizzy crags
Wi' wicked speed;
And in kirk-yards renew their leagues
Owre howkit dead. [disturbed]

Thence country wives, wi' toil an' pain,
May plunge an' plunge the kirn in vain; [churn]
For oh! the yellow treasure's taen [i.e., the butter]
By witchin' skill;
An' dawtit, twal-pint Hawkie's gane [petted, twelve-pint cow]
As yell's the bill. [dry, bull]

Thence mystic knots mak great abuse
On young guidmen, fond, keen, an' crouse; [husbands, cocksure]
When the best wark-lume i' the house, [tool]
By cantrip wit, [magic]
Is instant made no worth a louse,
Just at the bit. [crisis]

When thowes dissolve the snawy hoord, [thaws, hoard]
An' float the jinglin' icy boord,
Then water-kelpies haunt the foord, [-spirits]
By your direction,
An' 'nighted travelers are allur'd
To their destruction.

An' aft your moss-traversing spunkies [bog-, goblins]
Decoy the wight that late an' drunk is:
The bleezin, curst, mischievous monkies
Delude his eyes,
Till in some miry slough he sunk is,
Ne'er mair to rise.

When masons' mystic word an' grip
In storms an' tempests raise you up,
Some cock or cat your rage maun stop, [must]
Or, strange to tell!
The youngest brither ye wad whip
Aff straught to hell. [straight]

Lang syne, in Eden's bonnie yard, [ago, garden]
When youthfu' lovers first were pair'd,
And all the soul of love they shar'd,
The raptur'd hour,
Sweet on the fragrant flow'ry swaird, [sward]
In shady bow'r;

Then you, ye auld snick-drawing dog! [scheming]
Ye cam to Paradise incog,
An' play'd on man a cursed brogue, [trick]
(Black be