]
And pouk my hips. [poke]

'See, here's a scythe, and there's a dart--
They hae pierc'd mony a gallant heart;
But Doctor Hornbook, wi' his art
And cursed skill,
Has made them baith no worth a fart;
Damn'd haet they'll kill. [Devil a thing]

''Twas but yestreen, nae farther gane, [last night]
I threw a noble throw at ane--
Wi' less, I'm sure, I've hundreds slain--
But deil-ma-care!
It just play'd dirl on the bane, [rang, bone]
But did nae mair.

'Hornbook was by wi' ready art,
And had sae fortified the part
That, when I looked to my dart,
It was sae blunt,
Fient haet o't wad hae pierc'd the heart [Devil a bit]
O' a kail-runt. [cabbage stalk]

'I drew my scythe in sic a fury
I near-hand cowpit wi' my hurry, [upset]
But yet the bauld Apothecary
Withstood the shock;
I might as weel hae tried a quarry
O' hard whin rock.

'E'en them he canna get attended,
Altho' their face he ne'er had kenn'd it,
Just sh-- in a kail-blade, and send it, [cabbage-leaf]
As soon's he smells't,
Baith their disease, and what will mend it,
At once he tells't.

'And then a' doctor's saws and whittles,
Of a' dimensions, shapes, an' mettles,
A' kinds o' boxes, mugs, an' bottles,
He's sure to hae;
Their Latin names as fast he rattles
As A B C.

'_Calces_ o' fossils, earths, and trees;
True _sal-marinum_ o' the seas;
The _farina_ of beans and pease,
He has't in plenty;
_Aqua-fortis_, what you please,
He can content ye.

'Forbye some new uncommon weapons,-- [Besides]
_Urinus spiritus_ of capons;
Or mite-horn shavings, filings, scrapings,
Distill'd _per se_;
_Sal-alkali_ o' midge-tail clippings,
And mony mae.' [more]

'Wae's me for Johnny Ged's Hole now,' [the grave-digger's]
Quoth