He wha could brush them down to mools--
Willie's awa!

[Footnote 1: Edinburgh.]

The brethren o' the Commerce-chaumer
May mourn their loss wi' doolfu' clamour;
He was a dictionar and grammar
Among them a';
I fear they'll now mak mony a stammer;
Willie's awa!

Nae mair we see his levee door
Philosophers and poets pour,
And toothy critics by the score,
In bloody raw!
The adjutant o' a' the core--
Willie's awa!

Now worthy Gregory's Latin face,
Tytler's and Greenfield's modest grace;
Mackenzie, Stewart, such a brace
As Rome ne'er saw;
They a' maun meet some ither place,
Willie's awa!

Poor Burns ev'n Scotch Drink canna quicken,
He cheeps like some bewilder'd chicken
Scar'd frae it's minnie and the cleckin,
By hoodie-craw;
Grieg's gien his heart an unco kickin,
Willie's awa!

Now ev'ry sour-mou'd girnin blellum,
And Calvin's folk, are fit to fell him;
Ilk self-conceited critic skellum
His quill may draw;
He wha could brawlie ward their bellum--
Willie's awa!

Up wimpling stately Tweed I've sped,
And Eden scenes on crystal Jed,
And Ettrick banks, now roaring red,
While tempests blaw;
But every joy and pleasure's fled,
Willie's awa!

May I be Slander's common speech;
A text for Infamy to preach;
And lastly, streekit out to bleach
In winter snaw;
When I forget thee, Willie Creech,
Tho' far awa!

May never wicked Fortune touzle him!
May never wicked men bamboozle him!
Until a pow as auld's Methusalem
He canty claw!
Then to the blessed new Jerusalem,
Fleet wing awa!

Note To Mr. Renton Of Lamerton

Your billet, Sir, I grant receipt;
Wi' you I'll canter ony gate,
Tho' 'twere a trip to yon blue warl',
Whare birkies march on burning marl:
Then, Sir, God willing, I'll attend ye,
And to his goodness I commend ye.

R. Burns

Elegy On "Stella"

The following poem is the work of some hapless son of the Muses who
deserved a better fate. There is a great deal of "The voice of Cona" in
his solitary, mournful notes; and had the sentiments been clothed in
Shenstone's language, they would have been no discredit even to that
elegant poet.--R.B.

Strait is the spot and green the sod
From whence