e's him that's far awa, Willie!
Here's him that's far awa;
And here's the flower that I lo'e best--
The rose that's like the snaw!
THERE'LL NEVER BE PEACE TILL JAMIE COMES HAME
By yon castle wa', at the close of the day,
I heard a man sing, tho' his head it was grey:
And as he was singing, the tears down came--
'There'll never be peace till Jamie comes hame.
'The church is in ruins, the state is in jars,
Delusions, oppressions, and murderous wars;
We dare na weel say't, but we ken wha's to blame--
There'll never be peace till Jamie comes hame.
'My seven braw sons for Jamie drew sword, [handsome]
And now I greet round their green beds in the yerd; [weep, churchyard]
It brak the sweet heart o' my faithfu' auld dame--
There'll never be peace till Jamie comes hame.
'Now life is a burden that bows me down,
Sin' I tint my bairns, and he tint his crown; [lost, children]
But till my last moment my words are the same--
There'll never be peace till Jamie comes hame.'
I HAE BEEN AT CROOKIEDEN
I hae been at Crookieden-- [Hell]
My bonie laddie, Highland laddie!
Viewing Willie and his men-- [Duke of Cumberland]
My bonie laddie, Highland laddie!
There our foes that burnt and slew--
My bonie laddie, Highland laddie!
There at last they gat their due--
My bonie laddie, Highland laddie!
Satan sits in his black neuk-- [corner]
My bonie laddie, Highland laddie!
Breaking sticks to roast the Duke--
My bonie laddie, Highland laddie!
The bloody monster gae a yell-- [gave]
My bonie laddie, Highland laddie!
And loud the laugh gaed round a' Hell-- [went]
My bonie laddie, Highland laddie!
CHARLIE HE'S MY DARLING
'Twas on a Monday morning
Right early in the year,
That Charlie came to our town--
The Young Chevalier!
CHORUS
An' Charlie he's my darling,
My darling, my darling,
Charlie he's my darling--
The Young Chevalier!
As he was walking up the street
The city for to view,
O, there he spied a bonie lass
The window looking thro!
Sae light's he jumped up the stair,
And tirl'd at the pin;
|