permeson hodiaux?

MORTEN
Ne; sed ni luktis kun la aliaj dum la pauxzo --

EJLIF
Ne estas vero; estis la aliaj, kiuj luktis kun ni.

MORTEN
Jes, kaj sinjoro Rorlund diris, ke ni pli bone restu hejme kelkajn
tagojn.

DOKTORO STOCKMANN
(klakas per la fingroj kaj eksaltas de la tablo) Jen mi vidas! Jen
mi vidas, mi jxuru! Vi neniam plu metu viajn piedojn en la lernejon!

LA KNABOJ
Ne en la lernejon!

SINJORINO STOCKMANN
Sed ne, Tomas --

DOKTORO STOCKMANN
Neniam, mi diras! Mi volas mem instrui vin; -- ja, tio signifas, ke
vi ecx nenion lernu --

MORTEN
Hura!

DOKTORO STOCKMANN
-- sed mi volas fari el vi liberajn, noblajn homojn. Auxdu, pri tio
vi devas helpi min, Petra.

PETRA
Jes, patro, fidu min je tio.

DOKTORO STOCKMANN
Kaj la lernejo, gxi estu en la salono, kie ili moknomis min
popolmalamiko. Sed ni bezonas plurajn; mi devas havi almenaux dek du
knabojn por komenci.

SINJORINO STOCKMANN
Ilin vi certe ne trovos en tiu cxi urbo.

DOKTORO STOCKMANN
Ni vidos. (al la knaboj) Cxu vi ne konas iujn stratbubojn, -- iujn
vere bubacxajn --?

MORTEN
Jes, patro, el tiuj mi konas multajn!

DOKTORO STOCKMANN
Jen bone; havigu kelkajn por mi. Unu solan fojon mi volas
eksperimenti pri la hundacxoj; ofte sidas strangaj kapoj sur ili.

MORTEN
Sed kion ni do faru, kiam ni jam estos liberaj kaj noblaj homoj?

DOKTORO STOCKMANN
Tiam vi forpelu cxiujn lupacxojn al la fora okcidento, knaboj!

(_Ejlif_ aspektas iom dubema; _Morten_ saltetas kaj krias hura.)

SINJORINO STOCKMANN
Aj, se nur tiuj lupacxoj ne forpelos vin, Tomas.

DOKTORO STOCKMANN
Cxu vi tute frenezigxas, Katrine! _Forpeli min_? Nun, kiam mi estas
la plej forta viro en la urbo!

SINJORINO STOCKMANN
La plej forta -- _nun_?

DOKTORO STOCKMANN
Jes, tian grandan vorton mi kuragxas esprimi, ke _nun_ mi estas unu
el la plej fortaj viroj en la tuta mondo.

MORTEN
Ho ne do!

DOKTORO STOCKMANN
(mallauxtigas la vocxon) Tsx; ankoraux ne tion priparolu; sed mi
faris grandan malkovron.

SINJORINO STOCKMANN
Nun denove?

DOKTORO STOCKMANN
Certe, jes certe! (kolektas ilin cxirkaux sin kaj diras konfideme)
La afero estas tia, komprenu, ke la plej forta viro en la mondo,
estas tiu, kiu staras tute sola.

SINJORINO STOCKMANN
(ridetas skuante la kapon) Ho, vi Tomas --!

PETRA
(fidoplene, kaptas liajn manojn) Patro!

End of the Project Gutenberg EBook of Popolmalamiko, by Henrik Ibsen

*** END OF THIS PROJECT GUTENBERG EBOOK