thee at rest!
The great, the wealthy, fear thy blow
From pomp and pleasure torn;
But, oh! a blest relief to those
That weary-laden mourn!"

GREEN GROW THE RASHES

There's naught but care on every han',
In every hour that passes, O:
What signifies the life o' man,
An 't werena for the lasses, O?

CHORUS

Green grow the rashes, O!
Green grow the rashes, O!
The sweetest hours that e'er I spent
Were spent amang the lasses, O!

The warly race may riches chase,
An' riches still may fly them, O;
An' though at last they catch them fast,
Their hearts can ne'er enjoy them, O.

But gi'e me a canny hour at e'en,
My arms about my dearie, O;
An' warly cares, an' warly men,
May a' gae tapsalteerie, O!

For you sae douce, ye sneer at this,
Ye're nought but senseless asses, O;
The wisest man the warl' e'er saw,
He dearly loved the lasses, O.

Auld Nature swears the lovely dears
Her noblest work she classes, O;
Her 'prentice han' she tried on man,
An' then she made the lasses, O.

IS THERE FOR HONEST POVERTY

Is there for honest poverty
That hangs his head, and a' that?
The coward slave, we pass him by,
We dare be poor for a' that!
For a' that, and a' that,
Our toil's obscure, and a' that:
The rank is but the guinea's stamp,
The man's the gowd for a' that.

What though on hamely fare we dine,
Wear hoddin gray, and a' that?
Gi'e fools their silks, and knaves their wine,
A man's a man for a' that;
For a' that, and a' that,
Their tinsel show, and a' that--
The honest man, though e'er sae poor,
Is king o' men for a' that.

Ye see yon birkie,[31] ca'd a lord,
Wha struts, and stares, and a' that:
Though hundreds worship at his word,
He's but a coof[32] for a' that:
For a' that, and a' that,
His riband, star, and a' that--
The man of independent mind,
He looks and laughs at a' that.

A prince can mak' a belted knight,
A marquis, duke, and a' that,
But an honest man's aboon his might--
Guid faith, he mauna fa' that!
For a' that, and a' that,
Their dignities, and a' that,
The pith o' sense and pride o' worth
Are higher ranks than a' that.

Then let us pray that come it may--