h or fame ye've left your Jean,
Forgat your plighted vow, Willie;
Can honours proud dispel the cloud,
That darkens on your brow, Willie?
Oh, was I then a thing sae mean,
For nought but beauty prized, Willie;
Caress'd a'e day, then flung away,
A fading flower despised, Willie?

Sin' love has fled, and hope is dead,
Soon my poor heart maun break, Willie;
As your ain life, oh, guard your wife--
I 'll love her for your sake, Willie.
Through my despair, oh, mony a prayer,
Will rise for her and ye, Willie;
That ye may prove to her, in love,
Mair faithfu' than to me, Willie.

HEY, MY BONNIE WEE LASSIE.

Hey, my bonnie wee lassie,
Blythe and cheerie wee lassie,
Will ye wed a canty carle,
Bonnie, bonnie wee lassie?

I ha'e sheep, an' I ha'e kye,
I ha'e wheat, an' I ha'e rye,
An' heaps o' siller, lass, forbye,
That ye shall spen' wi' me, lassie!
Hey, my bonnie wee lassie,
Blythe and cheerie wee lassie,
Will ye wed a canty carle,
Bonnie, bonnie wee lassie?

Ye shall dress in damask fine,
My goud and gear shall a' be thine,
And I to ye be ever kin'.
Say,--will ye marry me, lassie?
Hey, my bonnie wee lassie,
Blythe and cheerie wee lassie,
Will ye wed a canty carle,
Bonnie, smiling wee lassie?

Gae hame, auld man, an' darn your hose,
Fill up your lanky sides wi' brose,
An' at the ingle warm your nose;
But come na courtin' me, carle.
Oh, ye tottering auld carle,
Silly, clavering auld carle,
The hawk an' doo shall pair, I trew,
Before I pair wi' ye, carle!

Your heart is cauld an' hard as stanes,
Ye ha'e nae marrow in your banes,
An' siller canna buy the brains
That pleasure gie to me, carle!
Oh, ye tottering auld carle,
Silly, clavering auld carle,
The hound an' hare may seek ae lair,
But I'll no sleep wi' ye, carle.

I winna share your gowd wi' ye,
Your withering heart, an' watery e'e;
In death I'd sooner shrouded be
Than wedded to ye, auld carle!
Oh, ye tottering auld carle,
Silly, clavering auld carle,
When roses blaw on leafs o' snaw,
I'll bloom upon your breast, carle.

But there's a lad, an' I'm his ain,
May heaven b