Mi eble devus provi, se mi povus mildigi -- nobligi ilian vivosorton.

ALLMERS

Se _tion_ vi povos, Eyolf ne naskigxis senutile.

RITA

Kaj li ne estas senutile de ni forprenita.

ALLMERS

(rigardas sxin firme) Sed komprenu la kialon, Rita. Ne estas amo, kiu
igas vin tion fari.

RITA

Ne, tute ne. Almenaux ne ankoraux.

ALLMERS

Nu, kaj jen kio do estas?

RITA

(duone cedante) Vi ja ofte parolis kun Asta pri la homa respondeco --

ALLMERS

Pri la libro, kiun vi malamis.

RITA

Mi malamas tiun libron ecx nun. Sed mi sidis auxskultante, kiam vi
rakontis. Kaj nun mi volas mem pluen provi. En _mia_ maniero.

ALLMERS

(agitas la kapon) Ne estas pro la nefinita libro --

RITA

Ne, mi havas kroman kialon.

ALLMERS

Jen kiun?

RITA

(silente, pezanime ridetante) Mi volas akiri la pardonon de du
grandaj malfermitaj okuloj, vidu.

ALLMERS

(frapite, fiksas la rigardon sur sxin) Eble vi permesus al mi
kunlabori? Kaj helpi vin, Rita?

RITA

Cxu vi volus?

ALLMERS

Jes, -- se mi nur scius, ke mi povus.

RITA

(hezitante) Sed tiuokaze vi devus ja resti cxi tie.

ALLMERS

(silente) Ni provu, cxu tio sukcesos.

RITA

(preskaux neauxdeble) Ni provu, Alfred.

(Ambaux silentas. Poste _Allmers_ iras al la stango kaj levas la
flagon tute supren. _Rita_ staras apud la pavilono kaj rigardas lin
silente.)

ALLMERS

(revenas antauxen) Estos peza labortago por ni, Rita.

RITA

Vi vidos, -- tiam foje falos dimancxtrankvilo super nin.

ALLMERS

(silente, tusxita) Tiam ni perceptos viziton de la spiritoj, eble.

RITA

(flustrante) La spiritoj?

ALLMERS

(kiel antauxe) Jes. Tiam ili eble cxirkauxas nin, tiuj kiujn ni
perdis.

RITA

(kapsignas malrapide) Nia eta Eyolf. Kaj ankaux via granda Eyolf.

ALLMERS

(fiksrigardas antauxen) Eble ni ankoraux foje -- sur la vivovojo --
kvazaux ekvidos ilin.

RITA

Kien ni rigardu, Alfred --?

ALLMERS

(fiksas la okulojn sur sxin) Supren.

RITA

(kapsignas konsente) Jes, jes, -- supren.

ALLMERS

Supren, al la pintoj. Al la steloj. Kaj al la granda kvieto.

RITA

(etendas al li la manon) Dankon!

End of the Project Gutenberg EBook of Eta Eyolf, by Henrik Ibsen

*** END OF THIS PROJECT GUTENBERG EBOOK ETA EYOLF ***

***** This file should be named 23837.txt or 23837.zip *****
This and all associated files of various formats will be found in:
http://www.gutenberg.org/2/3/8/3/23837/

Produc