t quemadmodum in Rep. vestra
adversus hostem potentissimum defendenda, & inter tantas bellorum moles
indies amplificanda, in Evangelii luce & veritate incontaminata contra
inferorum portas in vestris Ecclesiis propugnanda, atque inde latius
propaganda, immensa Dei vobis excubantis potentia, multiformis sapientia,
& eximia beneficentia, per universum terrarum orbem hactenus celebrata
est; ita bonis omnibus vos deinceps cumulare pergat idem fons omnis
bonitatis, ut frementibus religionis & libertatis vestrae hostibus,
sapientiae & optimarum artium juxta ac armorum triumphorumque gloria inter
nobilissimas gentes Resp. vestra foederata quotidie magis emineat, Ecclesia
sacrorum puritate, & caelestis veritatis splendore perspicua refulgeat;
eoque prospere vobis cedant vestra prudentissima & saluberrima consilia,
quibus certissimum ad faelicitatem publicam compendium vos capessure
demonstratis, nec vobis tantum consulitis, sed de vicinis etiam Ecclesiis
soliciti, qua opera, qua consilio opibusque vestris eas sublevatis &
confirmatis omnes, & quasi de specula unversis prospicientes de periculis
imminentibus commonefacitis, & ad ruinam ab hostibus dolose machinatam
mature precavendam armatis._

_Ergo quod anno superiori, veluti signo dato, Reformatas omnes Ecclesias,
missis ex_ Zelandia _literis commonuistis, ut cum impostores_, Jesu _nomen
impudenter ementiti, caeterique Antichristi satellites, quo securius in
populum erroribus Pontificiis fascinatum grassari, & puriores Christi
Ecclesias funditus extirpare queant, arctissima conjuratione Sociati ad
impia consilia patranda sese accinxerunt, Ita Ecclesiae quoque Reformatae
sine mora consilia in medium alacriter conferant, & animos ac vires
conjungant, ut perniciem sibi omnibus intentatam in hostium capita
retorqueant: ni fecerint, tam pudendae ignaviae excusatione apud
posteritatem carituri: consilium non minus prudens & fidum, quam faelix &
salutare libenter & tum agnovimus & nunc ipso etiam eventu comprobamus._

_Principio autem ad hoc consequendum necessarium videtur, ut sine mora
convolemus omnes ad Deum nostrum clementissimum, qui postquam Ecclesiarum
Reformatarum mores minime reformatos multis annis longanimitate sua
pertulisset, ferulam primum, mox etiam gladium vibratum interminata,
tandem rubentem & madidum suorumque sanguine calentem & spumantem per
regiones plurimas jam diu circumtulis; in nos denique reliquos nunc
intentat, nisi mature resipuerimus, & de domo ipsius